Pošuos februara suokuos, 1. i 2. februarī, Gertrudis īlys teatrī, Reigā, paradzāta storpdisciplinara nūtikšona – volūdu festivals “Avots” (latgaliski – “Olūts”). Festivala apmaklātuoji varēs īpasazeit ar tematiskom lekcejom, diskusejom i darbneicom par vysaidim ar volūdu saisteitim vaicuojumim. Festivala ūtrajā dīnā paradzātys nūtikšonys ari ap latgalīšu volūdu, viestej festivala reikuotuoju, kulturvītys “Volūdu sāta”, atsyuteituo informaceja.

Festivals “Avots” paradzāts divejis dīnys – sastdiņ, 1. februarī, i svātdiņ, 2. februarī. 1. februars byus veļteits volūdai individa i sabīdreibys attīceibu grīzuma, bet 2. februarī byus vareiba izzynuot vaira par mozuok lītuotajom volūdom. Kai nūruoda pasuocīņa reikuotuoji, volūdu festivalā “Avots” vītejī i storptatyskī eksperti, kai ari aktivisti i muokslinīki nu vysaidu sferu aicynuoti apsavērt iz volūdys vaicuojumim plotuok, dagrīžūt viereibys leidza pīsadaleišonai i vīnleidzeibai.

Festivala mierkis ir styprynuot diskursu ap volūdu daudzveideibu i volūdys izapausšonys vareibom, kas ir cīši saisteitys ar kulturu i muokslu. Runa nabyušūt ap volūdu kai lingvistisku fenomenu, bet ap tū, kai volūda dorbojās cylvāka pruotā, veidoj sabīdreibu i tml. Vītejī i uorzemu eksperti īpazeistynuos ar vysaidim redzīņa punktim, bolstūtīs iz volūdys aspekta, bet mozuok lītuotūs volūdu dīnā byus vareiba izzynuot vaira ap taidom volūdom kai latgalīšu, lībīšu, veravīšu, jaunnorvegu i cytom.

Pasuocīņa laikā interesenti varēs nūpierkt gruomotys i kulturprecis, apsavērt izstuodi ap zvīdru literaturu “Between the Lines / Starp rindām”, pīsadaleit tematiskuos darbneicuos, saspēlēt golda kaidys, īsavuiceit vuordus i frazys vysaiduos volūduos. Bet ari volūdu bolvys pasniegšona, kulturvītys “Volūdu sāta” izdūtuos gruomotys – Nobela premejis laureata Juna Fosis lugys “Kaids nūteikti atīs” tulkuojuma latgaliski i virtualuos izstuodis ap jaunnorvegu i latgalīšu volūdom “Linguapolis” atkluošona. Muzykali festivalu papyldynuos komponists i muzikis Edgars Cīrulis, pīduovojūt kompozicejis “Vārdšķiru svīta” pyrmatskaņuojumu.

Festivala “Avots” dalinīki puorstuov vysaidys volūdu, volūdnīceibys i kulturys sferys. Nūtikšonā pīsadaleis latgalīšu kulturys kusteibys “Volūda” puorstuovi, pīduovojūt lekceju ap latgalīšu volūdu i rokstu volūdys nūdarbeibu “10 idejis kai latgaliski raksteit lobuok”, Norvegu rokstu kulturys muzejs, Suomejis zvīdru asambleja “Folktinget”, Danejis Kulturys instituts, Latvejis Universitatis Lībīšu instituts, Latvīšu volūdys agentura, škārsteikla žurnals “Satori”, tekstgrupa “Orbīta”, Latvejis Jaunuo teatra instituta festivala “Homo Novus” puorstuovi, kai ari volūdneica Aiga Veckalne, zvīdru volūdneica i izdevieja Anna Fogele, volūdneica Signe Kazāka i c.